تربية العصافير وانواعها واسعارها وطريقة الإنتاج ، أمر أصبح محبباً لدي قطاع كبير من الشعب
المصر ، فالبعض يتخذه هواية ، والبعض يتخذه تجارة ، وثالث يأخذد من باب الزرنية واصدار الاصوات
الجميلة ، موقع “مصر الزراعية” في ضيافة الشاب عبدالله فرغلى لاستعراض كل مايتعلق بتربية العصافير
وأنواعها وأسعارها وطرق التربية الصحيحة والعلاج .
أولاً :- أنواع العصافير والبغبغانات
العصافير موجود منها أنواع كتير واشهرهم في مصر . ” الاسترالي – الزيبرا – الفيشر – الروز – الكناري – الجاوا ”
دي اشهر انواع العصافير اللي موجودة في مصر وطبعاً كل حاجة ليها طفرات يعني ألوان معينة وكل
لون لي اسم أو نوع معين وده مش هتحتاج تعرفه دلوقتي خالص . نيجي بقا لأشهر أنواع البغبغانات في مصر .
” كوكتيل – درة هندي – درة امريكي- زنجباري – مكاوي – كوكاتو – صن كونيور – سنغالي ” .
دي اشهر انواع البغبغانات اللي موجودة في مصر وطبعاً زيها زي العصافير كل نوع ليه طفرات مختلفه بأسامي مختلفه .
ثانياً :- أسعار العصافير الاسترالي
١٢٠ _ ١٥٠ ج الجوز . الفيشر ٣٠٠ _ ٣٥٠ ج الجوز . الروز ٣٠٠ _٣٥٠ ج الجوز . الزيبرا ١٠٠ _ ١٢٠ ج الجوز الجاوا ١٥٠ _ ٣٥٠ ج الجوز . ودي كانت اسعار اشهر أنواع العصافير . ندخل بقا علي اسعار البغبغانات . الكوكتيل ٣٠٠ _ ٢٥٠٠ ج الجوز . الزنجباري ٧٠٠٠ _ ١٦ ألف ج الفرد . الكوكاتو ٢٠ ألف_٥٠ ألف ج الفرد . السنغالي ١٠٠٠ _ ٢٥٠٠ ج الفرد . الصن كونيور ٢٠٠٠_٣٥٠٠ ج الفرد . المكاو ٢٠ ألف _ ٧٠ ألف ج الفرد . الدرة الهندي ٣٠٠٠ _ ٤٠٠٠ ج الجوز . الدرة الأمريكي ١٠ آلاف _ ١٣ ألف ج الجوز .
ودي كانت أسعار اشهر انواع البغبغانات في مصر ندخل بقا علي الأكل بتاع طيور الزينة كلها . أكل العصافير . ” بلكم – فلارس – دنيبة ” دي الحبوب أما بالنسبة للأكل الطري زي مثلا “خص _-جزر – خيار – بطاطا “. نيجي بقا للأكل بتاع البغبغانات . ” بلكم – فلارس – دنيبة – لب سوري ” والأكل الطري . ” خص – جزر – خيار – بطاطا “.
ثالثاً:- الإنتاج من العصافير .
١- لازم تتأكد من أن العصافير اللي عندك ذكر وانثي .
٢- بلوغ الذكر والانثى .
٣-تواجد العش الخاص بهم.
٤- توفير مكان هادئ تماماً.
٥- تحفيز الطيور علي التزاوج بالخضراوات مثل ” الجرجير ” أو المحفزات البيطرية .
٦-الاهتمام بصحة الطائر وعلاجه والحفاظ علي الملائم والفيتامينات البيطرية بالجرعة المحددة من البيطري . نيجي بقا للبغبغانات .
نفس الكلام لازم يتعمل معاهم ولكن في حاجات هتختلف زي مثلا .
١-توافر مكان كبير لهم .
٢- الهدوء التام دائماً
٣- توافر عش كبير لهم . المحافظة علي الأدوية البيطرية ومتابعة طبيب بيطري بشكل مستمر . ندخل بقا علي
رابعاً :- عدد البيض العصافير
بشكل عام بكل انواعها بتبيض من ٣ بيضات الي ٨ بيضات . أما البغبغانات فالطبيعي بتاعهم من ٣ بيضات الي ٨ بيضات ده في الكوكتيل والصن كونيور . والدرة الهندي والأمريكي والزنجباري والسنغالي والكوكاتو والمكاو بيبقي من ٣ بيضات الي ٥ بيضات . كل مرة .
خامساً :- مدة حضانات البيض .
بالنسبة للعصافير بالحضانة بتاعة البيض بتبقي لمدة ١٨ أو ١٩ يوم حسب درجة الحرارة ده في الصيف
أما في الشتاء من ٢٠ الي ٢٤ يوم . أما بقي البغبغانات فترة حضانة البيض عندهم بتختلف ماعدا الكوكتيل
والدرة الهندي والأمريكي من ٢٠ يوم الي ٢٣ يوم أما السنغالي والصن كونيور والزنجباري فمدة حضانتهم
من ٢٧ الي ٢٩ يوم . أما المكاو من ٢٣ الي ٢٧ يوم . أما الكوكاتو من ٣٠ الي ٣٢ يوم .
سادساً- مدة فطم الزغاليل
العصافير يتم فطم الزغاليل بعد مايقرب من ٣٥ يوم او ٤٠ يوم . أما البغبغانات الكوكتيل
من ٤٠ الي ٤٢ يوما . الدرة الامريكي والهندي والسنغالي والصن كونيور ٨٠ الي ٨٢ يوما .
المكاو والكوكاتو والزنجباري ٩٠ أو ٩٢ يوم.
