د. محمد فهيم يكتب "برمودة دق العامودة"

د. محمد فهيم يكتب “برمودة دق العامودة”

برمودة .. هو الشهر التامن من التقويم المصري اللي بتبدأ فيه السنة بشهر “توت” يوم 11 سبتمبر … وبيستمر زي كل الشهور المصرية 30 يوم .. وبيبدأ يوم 9 أبريل ولغاية 8 مايو .. وهو تالت شهر في فصل (برت) يعني (الإنبات أو النمو) فى مصر القديمة، لما بيخلص الفيضان بتاع نهر النيل وبتبتدي كل اراضي مصر تخضر والزرع والمحاصيل تغطي الغيطان.

وشهر برمودة بيجي ف الربيع والجو بيكون معتدل ودايما بيتم الاحتفال فيه بشم النسيم…

ومن الامثال المرتبطة بيه: “برمودة، دق العامودة” ، يعني دق سنابل القمح بعد نضجها وتجهيز القمح للدراس أو تذرية حبوبه بعد الحصاد …

شهر برمودة زراعيا

هو شهر ضم ودراس الغلة ورد الجميل لكل مزارع مجتهد قعد 150 إلى 160 يوم جنب غلته يرعاها وترعاه …

وسيكون هذا العام موسم خير ان شاء الله … ونفس الكلام للفول البلدي ومحاصيل الاعشاب الطبية ( كمون/يانسون/كراوية/ شمر / كسبرة …)

*** برمودة هو أهم شهر لكل أشجار الفاكهة على السواء لانه شهر اكتمال الاخصاب والعقد وتحديد اتجاه الموسم وهو الخاتمة الطيبة لشهور الربيع الأولى ( أمشير – برمهات) …

وحتى هذه اللحظة فقد بدأ موسم الفاكهة بدون مشاكل كبيرة ( زي السنوات الماضية) وان شاء الله ربنا هيجبر خاطر كل مزارعي الفاكهة ويعوض تعبهم خير ويعوضهم عن كسرات المواسم السابقة …

*** برمودة وهو شهر بداية الموسم الصيفي لكل محاصيل الصيف ( ذرة – أرز – قطن – وصويا – وخضر – وشتل بساتين الفاكهة الجديدة … وكمان البرسيم الحجازي … الخ ) والبداية الصحيحة فيه هي اختيار الصنف الصح بناءاً على الخريطة الصنفية وميعاد الزراعة بعيد عن موجات الحر او البرد ( وكل ده بيكون في توصيات في وقتها) ..

مطلوب من كل المزارعين يركزو خلال الشهر ده بحاجتين .. يعرف امتى يتدخل بالرش المناسب وبرامج تسميد نهضة الموسم ..

تاني حاجة ميسمحش للآفات الصيفية انها تتكاتر علي زرعه ويقطع عليها الطريق ( الذبابة البيضاء – التربس – التوتا ابسولوتا – دودة براعم الزيتون – دودة الحشد – دودة البلح الصغرى – الحشرات القشرية والبق الدقيقي … الخ).

وانا هكون معاكم أول بأول ان شاء الله مش هقصر على اد ما اقدر … فانتم تيجان رأس البلد وشوشة زرعه الأخضر.